Hartklop vir Lala Campaign

Woorde sal nooit genoeg wees om my liefdevolle vrou, Lin-Mari, te beskryf nie. Met 'n lewensreis soos net ons Hemelse Vader kan ontmoet ons op die mees wonderlikste wyse. Gou besef ons dat hierdie liefde net van God is en met net mekaar het ons niks meer nodig nie. Hier volg 'n persoonlike boodskap van my vrou......

"Hey ek is Lin-Mari Fourie (Kriel). Sagmoedig, liefdevol en 'n omgee-hart vir baie is woorde wat ek sal gebruik om myself te beskryf. In 2018 ontmoet ek die liefde van my lewe en op 16 Januarie 2021 beloof ons ewige trou aan mekaar. Jonk, pas getroud en 'n droom om enige ouers te word was een van die mees opwindenste mylpale wat ons graag saam wou ervaar. Maar,......gou word ons droom verdof en loop ons lewenspaadjie die mees vreemdste draaie met ons. Op 21 Desember 2021 word my wêreld donker, maar hou ek my hand stewig in God se hand met die diagnose van eierstokkanker. My linker eierstok en 'n gewas van 10Kg word verwyder. Gou skep ons asem en hoop dat daar darem nog 'n eierstok is. Maar o-wee daar groei nou ietsie op my regter eierstok. Gou besef ons dat God ons enigste kompas is waarmee ons nooit sal verdwaal. Hoe maak mens sin van hierdie onbeskryflike seer, hoe gee mens op aan 'n droom om eendag jou kinders van God te leer, hoe maak mens vrede om dalk nooit die woorde "Ek is lief vir Mamma" te hoor nie. Ons harte is stukkend, maar niks is onmoontlik by ons Hemelse Vader nie. Mag ons ewig en altyd op God vertrou met die wete dat hy sal voorsien. Dis vandag drie jaar later en die een chemobehandeling na die ander vind ons uiteindelik die chemobehandeling wat die beste vir my kanker werk, maar ons medies dek ongelukkig nie die chemobehandeling wat ek so dringend benodig nie. Die koste beloop R20 000 per chemo sessie waarvan ek drie sessies dalk meer van hierdie chemobehandeling moet ontvang. Hierdie fondse sal direk aan die kankervereniging oorbetaal word wat dit dan moontlik sal maak vir my om hierdie chemobehandeling te ontvang. Indien u dalk enige bydra wil maak tot my finansiële situasie sal ek dit onbeskryflik waardeer. Hierdie finansiële bydra sal dit vir my en my familie moontlik maak om alle onkostes wat nie deur die medies gedek word te betaal en die beste behandeling te kan kry en so 'n tweede asem en hoop vir 'n wonderlike toekoms te gee. Mag ons in moeilike tye ALTYD net ons oë en vertroue op God gerig hou."

Baie dankie.......

Liefde-Groete 

Lin-Mari